受《新喜劇之王》感動憶跑龍套日子　杜汶澤鼓勵年青人追夢：無夢想才是不切實際

周星馳《新喜劇之王》在賀歲檔票房不俗，上映兩日收500萬港元。《新喜劇之王》講女主角不斷努力向演員夢想出發，而杜汶澤今日在社交平台表示，因看完《新喜劇之王》深受感動，阿澤憶起那些年自己做臨時演員的日子，鼓勵追夢的年青人不要輕言放棄夢想。

杜汶澤在社交平台先寫出《新喜劇之王》對白：「你覺得你有機會咩？永遠都無！」「永遠即係幾遠呀？」「永遠即係由而家一直到宇宙滅亡.......」

▲ 《新喜劇之王》女主角被嘲「你覺得你有機會咩？永遠都無！」（畫面截圖）

之後阿澤就寫下一番夢想宣言：

「或者響好多人心目中，夢想係不切實際嘅！但係我覺得，無夢想嘅人生，至係真正嘅不切實際。當我今日見到新喜劇之王入面個女仔，佢一聽到只要見到樣，就算唔使錢都肯做咖（茄）哩啡嘅時候，佢揸住盒飯盒，背景音樂「天鵝湖」一出，我嘅眼淚已經流出嚟。

佢令我忽然間記得有一日，我響清水灣一廠收工，嗰日我不停NG，雖然只係一個連名都無嘅band 仔角色，而嗰日我只係得一句對白啫！我都演唔好、我都講唔到。返到屋企，我喊咗好耐，覺得自己好無用。我發誓我一定要做好佢，唔可以比自己再侮辱自己有得做演員呢個機會。」

▲ 《新喜劇之王》講女主角為追夢不惜一切。（畫面截圖）

阿澤稱：

因為呢個世界，唔係人人都咁好彩，可以做到自己想做到嘅嘢。

阿澤最後為夢想下定義：「如果你覺得夢想，只不過係人生嘅奢侈品，唔值得放棄任何嘢去追求，咁你嘅一生，其實就過得更奢侈，更浪費。」

▲ 杜汶澤現已成為電影演員監製及導演。（經濟日報圖片）

杜汶澤亦寫道：「我從來無放棄過成為一個偉大演員嘅夢想。」他並讚賞：「周星馳導演，就算瞓著覺，都拍贏好多人，我無選擇錯，因為我一向麻麻地賀歳片，好彩咁多套入面，我揀咗呢部。」

杜汶澤於1994年入行，於亞視當藝員出身，早年大多只演閒角，直至99年演《我和殭屍有個約會》才冒出頭來，後來終憑電影《無間道》演傻強而走紅。

近年杜汶澤除是電影演員，還身兼監製及導演。而杜汶澤兩年前創辦網絡傳媒平台「杜汶澤喱騷」，大膽起用不少年青人，給多對創作有熱誠的新人入行。